Bode Verlore

Nüt isch wahr
Hani erfahre
Itz isch mir klar
I cha dr Gloube nid bewahre
Dass i Wüsse besitze
Es git keni Norme
Itz fahni a, a allem umezschnitze
Und verleihe nim nöii Forme
A nüt i däm Läbe
I merkes nach und nach
Chani mi feschthäbe
Will alles isch Aasichtssach
Cha nur no hinterfrage
Und muess derbi riskiere
Dass weni witer so töif grabe
Dr Bode unter mir chönnt verliere

Bachab

Samschtig Abe – scho wider elei
Bademantel und Adilette
Alli si wäg, i blibe dehei
Und niemer wird mi rette
Es Gfüehl vo Nechi – ASMR
Dusse dunkel und nass
We doch ufschtah nur nid so schwär wär
I wott so vil und weiss glich nid was

Fettigs Haar und chalti Glider
Es het no Räschte vom Vortag
Süscht isch mir alles zwider
Müed wixe ohni Vorlag
Zvil Zyt und z’wenig z’tüe
Wahre Wohlschtandsgnuss
Merci Mami, i gibemer Müeh
Nid z’ertrinke im Überfluss

I träge es Gschwür im Chopf
Und füeteres mit Leid
Usemne grosse Topf
Wo leider geng no hie schteit
Ds Händy scho wider i de Händ
Sinnlos am umedrücke
Während mini vier Wänd
Immer enger zämerücke

I warte ufnes Zeiche
Oder dass e Komet
Ändlech die Wält wird preiche
Si isch so obsolet
I bines zäihs Schtück Schinke
Iiklemmt i altem Brot
Gseh geng no ds Glück mir winke
Ufemne sinkende Boot

No einisch schliichi zum Chüelschrank
Ha nur no Fröid am Frässe
Ds Läbe hie macht eim chrank
Und laht eim schnäll vergässe
Dass es chönnt anders ga
Und nid so huere abgfuckt
Ach was mir hei doch alles da
Vorgfertigt und schön verpackt

Ufbruch, Usbruch, System Change
Ghör ig dr inner Hippie schreie
U gibe zrügg: i weiss genau wasd meinsch
La mi wider ufs Sofa gheie
Mitemne Buech vom Herr Tolle
Ha no nid mal mi sälber gfunde
När chli dür Insta scrolle
I bi so wältverbunde

Und alles nimmt si Louf
E grosse Louf um d’Wett
Es isch wie Usverchouf
Es het solangs no het
Turnschueh zum halbe Priis
Sport isch o guet für d’Psyche
Und e gsundi Läbenswiis
Für se nid no meh z’versüche

Und mir isch längwiilig
Längwiilig ohni di
Es macht mi alles trurig
I gnüege mir eleini nid
Liebi chumm zrügg zu mir
Nimm mi no eis a d’Bruscht
I wär itz so gärn bi dir
Säg wo isch d’Läbensluscht

I gseh di struggle und du mi o
Während alls bachab geit
Es isch jetz halt e so
O we das niemer versteit
Geng no im Gfängnis us Ego u Verstand
Mit sine kahle Betonmuure
Und mini Zyt verschtriicht im Land
Vo de raschtlos tickende Uhre

Sandro Ramseier, 25. Januar 2020

Bode Verlore

Nüt isch wahr
Hani erfahre
Itz isch mir klar
I cha dr Gloube nid bewahre
Dass i Wüsse besitze
Es git keni Norme
Itz fahni a, a allem umezschnitze
Und verleihe nim nöii Forme
A nüt i däm Läbe
I merkes nach und nach
Chani mi feschthäbe
Will alles isch Aasichtssach
Cha nur no hinterfrage
Und muess derbi riskiere
Dass weni witer so töif grabe
Dr Bode unter mir chönnt verliere

Nüt Me Heilig

Oh du bisch so trurig
Grännisch fasch dr ganz Tag
Was isch nur passiert?

Oh du bisch so einsam
Und niemer füehlt e so wie du
Was wosch nur mache ohni si?

Oh du bisch so nidergschlage
Öpper het dir i dis Härz kotzt
Und alles wo du wosch isch Grächtigkeit
Doch die gits nid

Doch die gits nid, jajajaja…

Oh du hesch vil Hass i dir
Uf ihn und sie und uf d‘Mönschheit
Es söll doch alls in Flamme schta
Und unterga

Oh du hesch vo allem zvil
Und z‘wenig vo däm wo du bruchsch
Du weisch scho lang:
Die Wält isch schlächt

Oh du heschne scho gseh cho

Dä Tag wod zrügg i ds Loch gheisch
Blib nur dert unde, bis alls verbi isch
Oder bis du schtirbsch
Oder bis du schtirbsch, schtirbsch!

Schiiss uf alles!
Hüt isch nüt meh heilig!
Nur dis Wohlbefinde!
Oh, Hail Satan!

Weiss Nid

Dis Gsicht so fiin
Im helle Schiin
Di Blick voller Rueh
I luege dir zue

E Momänt für d’Ewigkeit
Wo lüchtend vor mir ufgeit
Schtriiche zärtlech über dis glatte Haar
Wünsche mir sehnlech, es wär würklech wahr

I weiss nid, was i dir chönnti schribe
Wirsch du für mi immer flach blibe?

Dänksch äch du o a mi?
I drücke ufnes Härz für di
Zieh di mit zwöine Finger a
Und füehle mi dir so nah

Blibe mit dir bis zum Änd
I ha no immer füf Prozänt
Und we du vor mir scho gli bisch verschwunde
Suecheni so lang bis i ds Ladekabel ha gfunde

I weiss würklech nie, was i dir chönnti schribe
Wirsch du für mi immer flach blibe?

Ferie In Miserie

Du gsehsch guet us
Bisch geng up to date
Und hesch für jede Aalass ds perfekte Outfit
Schnittigi Frisur
Me mues halt mit dr Zyt ga, gäll?

Odr fahre
Imne geile Schlitte (Schlitte, Schlitte, Schlitte)
Und pünktlech si bir Arbeit
De chasch dr ds nöischte Gadget easy leischte
Und fett ga frässe

 Uf dine Bilder gsehsch glücklech us
Doch in ächt isch dir schlächt
Bisch übersättigt
Vo all däm Kack

 D‘Grawatte schteit dir usgezeichnet
Wi amne Hündli d‘Leine
Ha ghört du machsch gärn ds Männdli
Für paar Likes oder e Ghaltserhöchig
Wasme halt so brucht zum Läbe

Da ghört o mal chli Rueh drzue
Schnäll füf Minute i di Whirlpool
Derzue di letschte News
Churz überflüge
Eländ und Gwalt – “längwilig
Hei si scho geschter brunge”

O dini Fründe gseh glücklech us
Doch in ächt isch ne schlächt
Sie hei zvil vo däm verschissne Kack

We dir alles hie grau erschiint
Wills nüt meh git wo di no reizt
Gönn dir Ferie (gönn dir Ferie) in Miserie (in Miserie)
Abwächslig tuet dir guet

 We dir alles hie grau erschiint
Wills nüt meh git wo di no reizt
Gönn dir Ferie (gönn dir Ferie) in Miserie (in Miserie)
We dir alles hie grau erschiint
Wills nüt meh git wo di no reizt
Gönn dir Ferie

Wär I Bi

Wie gwinnt me ds Läbe?
Da gits doch sicher sone Formle
Was söll me säge?
Da wirds doch sicher sone Norm gä

Es isch wie Fangis schpile
Alei i dim Zimmer
Im Wettbewärb da merkt me när
Isch me Verlierer oder Gwinner

So gschmeidig verchleidet und schön verpackt
Das mues ja richtig guet si
So prächtig u mächtig u sälber gmacht
E Zettel ar Wand isch kes Zepter ir Hand

Langsam gsehni ii: 

Verpasse chasch nur was möglech wär
Ds Pendel bewegt sech hin und här
Vilech schtoppts scho gli

I weiss no immer nid wär i bi
I hoffe es het irgendwo no Platz für mi
I ha weder d’Luscht no d’Energie
Jede abe z’merke,
Dass hüt scho wider morn wär gsi

Bildendi Brichte 
Mit Bilder und Gschichte 
Vom kulturelle Unterschid 
Ir Gägewart 

Verschideni Sitte 
Us verblibene Zyte 
D’Natürlechkeit vo Wüeschtesand 
Zu Rägewald 

D’Erfahrig chunnt nid usem Nüt derhär 
Mini Ouge luege scho schtarr und läär i Schpiegel dri

I weiss no immer nid wär i bi
I gloube es het irgendwo e Platz für mi
Alls la lige, alls la schta 
I briche uf, zum äntlech öppis Nöis afa

Troumboum

E Schmätterling wo hungrig isch
Alles gnüsslech verschlingt
D‘Wält isch farbig und schmöckt früsch
Är dänkt, dass ihm alls glingt

De wird är zfride und o satt
Schtudiert gnau jedes Blatt
Luegt dr Boum vo witem a
Und merkt, dass är nid alles cha

Dr Buch voll schöni Sache
Wo är dür z’Läbe treit
läbe liebe und lache
Wär z’Glück doch guet verteilt

Mit sine Flügel schtreift är d’Sunne
Mit sine Füehler schmöckt är z’Meer
Zwöi Sägel und ei Lunge
Harmoni blibt unversehrt

Si einisch nid einig
E Schtei uf dr Leitig
Si frei i dr Meinig
Abr leidr beleidigt

Einisch vrschteisch mi
Seisch es isch geil gsi
Mir verschweisse nis geischtig
Und leischte nis Freizyt

Weisch wie ni meine
Bim Reise nid entgleise
Chli Freiheit verteile
We verchleide nie verleidet

Är flatteret uf und ab
Dr Wind tribt ne uf d‘Reis
Nei, nid nur uf Amsterdam
Vil witer füehre d‘Gleis

Umwäge vo Blatt zu Blatt
Jedes Blettli e Troum
Drzwüsche wirds o mal warm mal chalt
Und geng no ligt dr Tou

E Schmätterling entwicklet sich
Vom Chind zu Ma odr Frou
So farbefroh und facetterich
Und gniesst eifach die Show

Guete Morge

Dr Kondi:

Sooo, guete Tag mitenand,
alli Billet vorwiise,
bonjour mes dames et monsieurs,
veuiller presentez le billet, s’il vous plaît.

Lutsprächergsäng:

Guete Morge mitenand.
Guete Morge mitenand.

Heiter z’Billet parat?
Heiter z’Billet parat?

Dr Kondi isch da!
Dr Kondi isch da!

Dr Kondi:

Grüessech

Ir Schibe

Uf de Schine rollt dr Wage richtig Frankfurt
Dunzendi vo Dörfli zieh a mir verbi
Ir Schibe widerschpieglet sech der Widerschpruch zum Blibe
Und z’Verlange nach däm wo isch gsi

Ufem Wäg um t’Wält vermischt sech t’Luscht mit Nöigier
Es git so vil z’entdecke wot nie hättsch gsuecht
Ufem Wäg für hei vermischt sech Fruscht mit Schtarchbier
Aber i has versuecht

Alls was ig ha gseh und dert woni bi gsi

I wott no meh bitte gimer nochli
I bi nid satt und füehre stattdesse
E Kampf zwüsche Sucht u Verschtand
T’Erinnerig chläbt a dr Delikatesse
I verlahmi uf mi

Es isch wie weni irgendwelchi Droge nime
Und druffe de e so umelige
All di gschtorbene Sorge so schön verborge blibe
I mine Ohre tribe sech Lieder ume

I bewege mi nid und chume glich vom Fläck
Dusse geid scho t’Sunne langsam unter
Ir Schibe widerschpieglet sech dr Widerstand zum Siige
Zwar ungerächt aber fair gnueg

Alls was i ha gseh und dert woni bi gsi

Nonid Müed

I bi nonid müed
U schlafe de glich
Wills eifach mues si
I

T’Ouge si scho zue
Dür t’Ohre schlicht
Ganz fiin
Sone Melodi

Si wanderet umenand
Mitre Uhr idr Hand
Wo schtill schteit

Si wartet uf ihri Pflicht
Ohni Wörter fürne Gschicht
Und lost druf wases seit

Frag mi ersch derna
Weni wider bi verstand bi
Und enstpannt bi

Es sött doch klar si
Jetzt e so öppis
Kreiere geid gad gar nid

I gloube ds tüscht

Frag mi ersch derna
Weni wider chli entspannt bi

Wätterumschwung

Es schüttet chübelwis Wasser uf t’Schtrasse
E richtige Klassiker im Herbscht
Alles lit nass und chalt ufem Asphalt
Fasch so als obs derte häreghört

T’Gärtner schaffe scho ufe Winter zue
Und dr Tag wird jede Tag chli chürzer
E farblos kaale Wald wo mal grüen wär gsi
Temperatur fallt und me merkts ersch hindedri

I weiss nid genau was passiert
Und öb ds nur am Wätter lit
Aber i ma nümme gseh

Wi alls zerkeit und immer meh a
Farb verliert, we Zyt vergeit

Uf dr Suechi nachem Unterschid
Zwüsche jetzt und denn

T’Flüss trage weniger Wasser als süsch
Und t’Schlöisene si chli meh zue
I gseh Lüt uf der Suechi nach Boumnüss
Es het für alli gnue – gar nid schwirig z’finde

Gedankekreise schwanke und schliesse
Nid ganz woni mers ha vorgschtellt – ou nei!
Dert wo du bisch gits ke Winter, und hie wirds immer
Schlimmer mitem Umschwung – i wotts wider warm

I weiss nid genau was passiert
Und öb ds nur am Wätter lit
Aber i ma nümme gseh

Wi alls zerkeit und immer meh a
Farb verliert, we Zyt vergeit
Uf dr Suechi nachem Unterschid
Zwüsche hüt und morn